Endesa Ligako titulua lortzeko borrokan, birritan neurtu dituzte indarrak bi taldeek lehen kanporaketan.
Denboraldi erregularra amaituta, denboraldiko unerik garrantzitsuena iristear dago. Larunbat honetan, maiatzak 27 (18:30), Joventuten aurka PlayOff-etako lehen partida jokatuko du Cazoo Baskoniak Buesa Arenan. Kanporaketa batean 12 aldiz neurtu dituzte indarrak bi taldeek, eta horietatik bi final-laurdenetan izan dira, talde bakoitzak kanporaketa bana irabaziz.
Acb sortu zenetik 40 urte pasa ondoren, talde arabarrak ez du inoiz hutsik egin PlayOff-ean, eta aurten ere bertan izango da. Kanporaketa guztietan hartu dute parte gasteiztarrek, 4 garaikur lortuz, azkena 2020. urtean, eta bost aldiz txapeldunorde izanez.
Zurbanoko klubak 230 neurketa jokatu ditu PlayOff-etan eta horietatik 121etan atera da garaile. Badalonako taldearen aurka bi aldiz neurtu ditu indarrak final-laurdenetan, garaipenen balantza banakoa izanik.
Gironan irabazi ondoren, txapelketako bigarren postuan amaitu du Cazoo Baskoniak, 28 garaipen eta 6 porroteko balantzarekin, 2004 eta 2005-eko marka berdinduz. Acb sortu zenetik, urdin-gorriek sei aldiz amaitu dute fase erregularra bigarren postuan (2006, 2010, 2013, 2017, 2018 eta 2023).
Cazoo Baskoniak denboraldi erregular bikaina burutu du, estatistiketako bost esparrutan lidertzan amaituz: balorazioa, puntuak, asistentziak, hiruko jaurtiketak eta hiruko jaurtiketen portzentaia. Bederatzi partidatan 100 puntuak gaindituta, historia egin du talde arabarrak. Bederatzirekin, Endesa Ligako neurketa bakar batean saskiratutako hiruko errekor berria ezarri zuen Markus Howardek. Denboraldi osoan 419 hiruko saskiratu dituzte Joan Peñarroyaren gizonek, ligaren historian inoiz lortutako markarik onena.
Zazpigarren postuan, 19 garaipenekin eta 15 porrotekin, amaitu du fase erregularra arabarren aurkariak. Bataz beste 81,4 puntu, 38,2 errebote, 16,6 asistentzia eta 92,8-ko balorazioa lortuta iritsiko da larunbateko norgehiagokara Joventut.
Cazoo Baskonia eta Joventuten arteko PlayOff-eko lehen partidaren testigu izango da larunbat honetan Buesa Arena. Final-erdietara igarotzeko bi neurketa irabazi beharko dira.
