Cazoo Baskoniak garaipena lortu du Buesa Arenan playoffetako postuetan sendo mantentzeko
Joan Peñarroyaren gizonek zazpigarren garaipena lortu dute Euroligan, FC Bayern Munichi Buesa Arenan irabazita. Hasiera trabatu baten ostean, etxeko taldea nagusi izanda partidaren osotasunean bere pabiloia gotorleku bihurtzen jarraituz. Pierria Henry izan da etxeko taldearen jokalaririk nabarmenena 14 puntu, 3 errebote, 10 asistentzia eta 28ko balorazioarekin.
Puntu gutxiko partida hasiera izan da eta etxeko taldeak lau minutu behar izan ditu lehen saskiratzea egiteko. Hortik aurrera, erasoan gehiago asmatzen hasi dira Joan Peñarroyarenak eta lehen laurdena 17 eta 10 markagailuarekin itxi dute, Marcus Howardek azken segundoan sartutako hiruko baten ondoren. Bigarren laurdena etxeko taldearen agintearekin jarraitu du eta Vanja Marinkovicek erreskadan sartutako bi hirukoren ostean, lehen zatiko abantailarik handiena lortu du Cazoo Baskoniak (42-26). Pierria Henryk azken segundoan lortutako saskiratzearekin, etxeko taldea abantaila politarekin (44-30) joan da aldageletara.
Lehen laurdenaren ildo beretik abiatu du Cazoo Baskoniak hirugarren laurdena eta hori baliatu du Andrea Trinchieriren taldeak markagailuan zertxobait hurbiltzeko (44-35). Talde bavariarrak hamar puntuko langa apurtu ostean iritsi da etxeko taldearen susperraldia eta zazpi eta hutseko partzialarekin markagailuan berriz ere ihes egitea lortu du (51-35). Azken hamar minutuetara 55 eta 42 markagailuaren iritsi da.
Azken laurdenean Joan Peñarroyaren gizonek beraien aldeko markagailua kudeatu ez ezik, abantaila handitzen joan dira partida 78 eta 53 markagailuarekin amaitzeko. Garaipen hau Euroligako zazpigarrena izan da Cazoo Baskoniarentzat eta beste astebetez playoffetako postuetan mantenduko da.
Garaipenaz gozatzeko astirik gabe, Joan Peñarroyaren gizonek Endesa Ligako jardunaldi berri bat egin behar diete aurre, Kanaria Handiari bisita eginez Igandean (18:30). Europako hurrengo hitzordua hurrengo asteazkenean izango du Turkian Anadolu Efes taldearen aurka (18:30).
