Baskoniak ezin izan du asteko bigarren garaipena lortu, Joventuten aurka 77 eta 72-ko markagailuarekin erori ondoren. Amaieraraino borrokatu badute ere, Dusko Ivanovicen gizonek ezin izan dute Badalonan batu. 11 puntu eta 22-ko balorazioarekin, Tadas Sedekerskis izan da jokalari urdin-gorri nabarmenena.
Gasteiztarrek irteera ona izan dute Badalonan, markagailuan aurretik jarriz (9-12). Baskoniak aurretik jarraitu du lehen laurdenaren amaierara arte (19-22). Talde kataluniarra suspertu egin da eta 10 eta 2-ko partzial batekin, bost puntuko abantaila lortu du (29-24). Joventutek aurretik jarraitu du laurdenaren minutu askotan, baina Dusko Ivanovicenen jokaldi on batzuek, puntu bateko errenta eman diete atsedenaldirako (37-38).
Aldageletatik bueltan, Baskoniak mantendu egin du puntu bakarreko diferentzia. Carles Duranen gizonek aurrerapausoa eman dute erasoan eta aurretik iristea lortu dute azken hamar minutuetara. Baskoniak borrokan jarraitu eta 65na berdintzea lortu du partida amaitzeko lau minuturen faltan. Azkenean, gasteiztarrek ezin izan dute Joventut gainditu (77-72).
Baskoniak bere hurrengo erronkei begiratzen die. Baskoniaren esprintean, Buesa Arenak 5 norgehiagoka hartuko ditu 9 egunetan.
